Síðan 2006 hefur VR starfrækt “svokallaðan” varasjóð fyrir félagsfólk, fjármagnaðan úr sjúkra- og orlofssjóði félagsins. Þótt sjóðurinn veiti stuðning við mikilvæg útgjöld eins og líkamsrækt, sálfræðiþjónustu, gleraugnakaup og fleira, er fyrirkomulagið ekki eins sanngjarnt.

​

Í dag eru greiðslur úr varasjóðnum ójafnar og ráðast af tekjum félagsmanna. Dæmi: Félagsmaður með 400 þúsund króna mánaðarlaun fær minna inn í sjóðinn árlega en félagsmaður með 800 þúsund króna laun. En hvað er sanngjarnt við það að stéttarfélag, sem á að berjast fyrir jafnræði og bættum kjörum félagsfólks, mismuni félagsmönnum eftir tekjum þegar kemur að úthlutun styrkja?

​

Á mínum starfsferli, bæði innan VR og í samtölum við félagsfólk, hefur komið fram mikil óánægja með varasjóðinn og úthlutunarreglur hans. Þegar litið er til annarra stéttarfélaga af svipaðri stærðargráðu má sjá að styrkjum er þar úthlutað á jafnræðisgrundvelli, óháð tekjum.

​

Sem formaður VR, mun ég leggja mig fram um að breyta fyrirkomulagi varasjóðsins. Tillaga mín er að leggja núverandi sjóð niður og koma á sanngjarnara styrkjakerfi sem nýtist öllu félagsfólki jafnt.

​

Helstu breytingar sem ég mun leggja til:

• Greiðslur verði veittar í ákveðnum flokkum sem félagsfólk getur nýtt að eigin vali.

• Flokkarnir munu innihalda:

  • Líkamsrækt

  • Gleraugnakaup og heyrnartæki

  • Sálfræðiþjónustu og tannlæknakostnað

  • Sjúkraþjálfun

  • Fæðingarstyrk.

​

Félagsfólk mun geta nýtt sér styrki í fleiri en einum flokki, allt eftir þörfum þeirra. Úthlutanir verða jafnar og byggðar á þeirri sýn að tryggja réttlæti og gagnsæi, líkt og tíðkast hjá öðrum stéttarfélögum.

​

Þetta nýja fyrirkomulag mun tryggja að allt félagsfólk VR fái jöfn tækifæri til að nýta sér styrki félagsins – óháð tekjum. Ég er sannfærður um að þessi breyting myndi styrkja félagsandann og stuðla að auknu trausti félagsfólks á VR.